Netsjúkraþjálfun fékk styrk úr Vísindasjóði Félags sjúkraþjálfara til að framkvæma verkefnið „Árangur af Netsjúkraþjálfun“. Markmiðið verkefnisins var að skoða árangur af Netsjúkraþjálfun sem meðferð fyrir einstaklinga með stoðkerfisverki.
Spurningalistar með 6 spurningum voru lagðir fyrir einstaklinga sem komu í Netsjúkraþjálfun árið 2019, í upphafi og lok meðferðar. Þessir einstaklingar komu í skoðunartíma hjá sjúkraþjálfara, fengu endurhæfingaáætlun sem samanstóð af sérhæfðum æfingum, fræðslu í takt við markmið og eftirfylgd. Einstaklingar voru í þjónustu allt frá 4 vikum og upp í 6 mánuði. Skilyrði fyrir þátttöku í þessari þjónustukönnun var að einstaklingur þurfti að hafa svarað öllum spurningunum í upphafi og við lok meðferðar. Þegar þau skilyrði voru uppfyllt, voru 39 þátttakendur. Um var að ræða einstaklinga með allskyns meiðsli og álagseinkenni, til dæmis verkir í kringum háls-, brjóst- og mjóhrygg, mjaðmir, axlir og herðar, hné og ökkla. Einnig voru þetta einstaklingar að koma eftir liðskipti, beinbrot og slys.
Út úr þessari þjónustukönnun kom að 59% af þessum einstaklingum höfðu farið áður í sjúkraþjálfun útaf sama vanda, 69% af þessum einstaklingum stunduðu reglulega hreyfingu að staðaldri og 97% af þessum einstaklingum myndu mæla með Netsjúkraþjálfun fyrir aðra með líkamleg álagseinkenni eða verki. Notaður var VAS verkjakvarði sem er kvarði frá 0-10, þar sem 0 eru engir verkir og 10 eru verstu mögulegu verkir. Meðaltalsbreyting hjá þessum einstaklingum sem komu í meðferð hjá Netsjúkraþjálfun var lækkun um 2,7 á VAS verkjakvarðanum.
Niðurstöðurnar sýna góðan árangur hjá þessum einstaklingum eftir meðferð hjá Netsjúkraþjálfun. Áhugavert væri í kjölfarið að sjá hvernig þessum einstaklingum vegnar 3 og 6 mánuðum eftir útskrift. Einnig væri áhugavert að að sjá ítarlegri spurningalista hjá einstaklingum sem koma í Netsjúkraþjálfun ásamt því að bera það saman við hefðbundna meðferð við sambærilegum kvillum.